Темір темірдей табандылығын алғашқы күндерден ақ көрсете білді. “Бармақ басты, көз қысты” баяндама жасап үйренген басқарма басшыларын тығырыққа тіреді. Әсіресе, өңірдегі үш ауысымды мектептердің мәселесін майшаммен қарады. Себебі жауапты сала басшысы облыста “үш ауысымды үш мектеп бар” деп жалған мәлімет берген. Мұның ақ-қарасын айыру үшін Темір Базарбайұлы арнайы комиссия құрып, шалғай ауылдарды түгел аралап шықты. Тексеру кезінде талапқа сай келмейтін 100-ге жуық білім ошағы анықталған.
Темір Қырықбаевтың тікелей жетекшілігімен Жетісайдағы тұралап қалған Шоқан Уәлиханов мектебінің құрылысы қайта жүргізілетін болды. Ескі ғимараты сүріліп, қазандығы қазылған күйі қалған мектептің жайын жергілікті жұрт бірнеше жылдан бері көтеріп жүрген еді.
Облыстағы білім саласының кем-кетігін түзеген Темір Қырықбаевтың ендігі мақсаты елдің мәселесін мәслихатта көтеру.



